Принцот Вилијам и неговата сопруга Кетрин заминаа на свадбено патување. Веста беше потврдена и од кралскиот двор, но точната локација остана во тајност.
Сепак, британските медиуми не седеа со скрстени раце и открија информации дека младиот брачен пар престојува на еден од прекрасните Сејшелски острови.
Видни медиуми тврдат дека Кетрин и Вилијам се на островот North Island.
Островот North Island
Германскиот весник Hamburger Abendblatt отиде еден чекор подалеку и објави изјава од милионерот Фарад Влади, којшто им го изнајмил островот на младоженците. „Да, му го дадовме под наем островот на британското кралско семејство. Принцот Вилијам и неговата жена Кејт го поминуваат својот меден месец таму. Но, ќе разберете дека нема да откриеме повеќе информации“ – изјавил тој.
На островот има 11 луксузни вили со поглед кон Индискиот Океан. Се смета дека една медена вечер на кралското семејство чини повеќе од 6 500 долари.
„Островот е многу популарен кај славните личности кои сакаат луксуз, но и целосна приватност. Сите што се таму се на меден месец, па Вилијам и Кејт нема да бидат беспокоени. Таму нема многу што да се прави, но тоа е и поентата“ – пишува The Sun, потпирајќи се на изјавата на анонимен извор.
