Емотивната приказна на Ијан и Лариса Марфи, исполнета со љубов, надеж, оптимизам и верба, ќе ви докаже дека вистинска љубов сепак постои.
Лариса и Ијан се запознале во 2005 година додека биле на колеџ во Западна Пенсилванија. Брзо се заљубиле еден во друг и планирале да стапат во брак веднаш штом ќе завршат со студирањето.
Но, нивните планови биле променети од страшна сообраќајна несреќа во која Ијан доживеал сериозни повреди на мозокот.
По несреќата Ијан воопшто не можел да зборува, не можел ниту да се движи или храни без нечија помош. Во тие моменти Лариса знаела точно што да направи – без двоумење се преселила кај семејството на Ијан за да му помага додека нè закрепне.
„Се преселив кај неговото семејство по несреќата, па навистина бев вклучена во терапијата и правев сè што можев за да му го направам животот забавен. Излегувавме на состаноци. Сега кога се навраќам на спомените, малку е чудно, бидејќи тој не можеше да зборува и не можеше да јаде, па веројатно изгледавме како вистински чудаци кога одевме на состаноци. Но, си поминувавме многу убаво и јас постојано му зборував“ – изјавила таа.
Состојбата на Ијан се подобрувала многу бавно. Во текот на годините, многу од пријателите на Ијан и Лариса стапувале во брак и создавале свои семејства, но бракот за нив двајцата не бил опција сè додека тој не закрепнал доволно за да може да комуницира.
„Одлуката да стапиме во брак беше една од најтешките, но и наједноставните одлуки со кои ќе се соочиме. Сум слушнала дека решението за стапување во брак кај некои буди колебање и стравови. Сметам дека инвалидитетот ги зема тие нормални стравови и ги умножува... Беше многу лесно: се сакаме. И го сакаме Бог“ – рекла Лариса.
Поради здравствената состојба, судот требало да одлучи дали е најдобро за Ијан да се ожени. Судијата кој ја одобрил дозволата бил трогнат од нивната приказна и изјавил: „Вие двајца служите како пример за тоа што е љубов. Верувам дека бракот не само што е за ваше добро, туку е и за доброто на нашата заедница и се надевам дека сите во овој град можат да ја видат љубовта која ја имате еден за друг.“
Ијан и Лариса стапиле во брак на 28 август 2010 година, а во мај минатата година бил објавен краток документарен филм за нивната љубовна приказна. Деновиве истото видео повторно кружи на социјалните мрежи, бидејќи е добар потсетник за искрената и безусловна љубов.
На својот блог, Лариса и Ијан редовно објавуваат што се случува во нивниот живот. Благодарение на физикална терапија, Ијан пред неколку месеци за првпат по седум години излезе од домот без инвалидска количка, само со помагало за движење.
Во интервју за списанието „Darling“, Лариса открила за што би сакала да ги инспирира другите луѓе. „Наш драг пријател ја изгуби својата сопруга неколку месеци пред нашата свадба. Тој се грижеше за неа многу години додека таа се бореше со рак. Пред свадбата, тој кажа зборови кои засекогаш ќе останат со мене: Никогаш нема да зажалиш што сакаш толку силно. Толку е едноставно. Љубовта дава живот“ – рекла таа.
Лариса е убедена дека доколку таа би била на местото на Ијан, тој никогаш немало да ја напушти.