Модната куќа Диор ја имаше честа да ја отвори модната недела на високата мода во Париз за време на која најистакнатите дизајнери ќе ги покажат своите префинети колекции за сезоната есен/зима 2011.
За првпат во 15 години на крајот од ревијата не се поклони генијалниот Џон Галијано. Аплаузите за колоритната ревија ги примија Бил Гејтен и асистентката Сузана Венегас. Гејтен, кој 23 години работеше со Галијано, минатата недела беше именуван за наследник на брендот Џон Галијано, но засега нема индикации дека ќе го преземе кормилото и во Диор.
„Не брзаме, ние сакаме да најдеме долгорочно решение... Сите опции се отворени“ – изјавил за новинарите Сидни Толедано, извршниот директор на Диор.
Колекцијата изобилуваше со големи сукњи во форма на цветови, графички принтови, многу слоеви и набори, плисирани фустани и сукњи, раскошни тоалети, бои кои потсетуваа на бонбони... Сè на сè, еклектична колекција.
