Брачни партнери ослабеле вкупно 152 кг откако се засрамиле од сопствениот изглед на свадбените фотографии.
Пред големото слабеење, Ноел и Леиза Хои од Даблин заедно тежеле 330 кг. За нив било невозможно да седат еден до друг на кино или во авион и четирипати го имале скршено креветот на кој спиеле поради огромната тежина.
Сепак, 35-годишниот сопруг и 33-годишната сопруга, едногласно одлучиле дека е време за слабеење откако го прелистале својот свадбен албум. „Кога ги видов сликите од свадбата, срцето ми се скрши. Почувствував одвратност кон нас како пар. Од моментот кога ги видов, знаев дека тоа НЕМА да бидат фотографии на кои ќе се навраќам со насмевка и кои ќе ги чувам засекогаш. Бев премногу разочарана“ – рекла Леиза.
Ноел и Леиза, кои отсекогаш биле зависници од брза храна, се запознале во 2003 година, а во 2013 стапиле во брак. Нивната тежина го достигнала максимумот по раѓањето на нивните четири деца, 11-годишниот Ејџеј, 8-годишниот Тајрис и 2-годишните близнаци Медисон и Тори. По раѓањето на близнаците, Леиза тежела 127, а Ноел 203 килограми.
„Бевме свесни дека сме големи, но со вкупна тежина од 303 кг не само што не бевме здрави, туку и бевме како темпирани бомби. Не можевме да го игнорираме фактот дека нештата се многу лоши. Навечер не можевме да спиеме, не поради нашите деца, туку поради крцкањето на рамката на креветот под нас. Еднаш се вратив исцрпена дома по ноќната смена и скокнав в кревет, а дрвото расцвета поради мојата тежина и се распадна. Го скршивме креветот уште трипати потоа. Најпосле се откажавме и спиевме на душек поставен на подот“ – рекла Леиза.
На Леиза ѝ било екстремно тешко и да пронајде невестински фустан. „Избирањето фустан не беше баш магично искуство какво што си го замислував. Бев ограничена на само една продавница во градот и сите фустани кои ме собираа изгледаа како да носам огромен јорган на себе. Го носев најдолгиот можен превез за да го искористам како наметка со која да ги скријам моите дебели раце“ – додала таа.
Со огромна посветеност двајцата започнале да вежбаат и за кратко време виделе огромни резултати кои ги мотивирале уште повеќе да се трудат. „Облеката висеше на нас. Како што намалувавме тежина, моравме да го обновуваме и нашиот плакар. Нашите фигури толку многу се променија. Сега се чувствуваме прекрасно. Наоѓаме радост во малите работи како трчањето по нашите деца и можноста да носиме облека која не е plus-size. Имам многу поголема слобода“ – вели Леиза.
Парот планира уште еднаш да се заколне на вечна љубов и да направи свадба на која невестата ќе може да ја носи венчаницата од своите соништа.