Болно девојче не можеше да си ја сокрие среќата кога дозна дека наскоро ќе добие ново срце и нова шанса за нормален живот.
11-годишната Ава помина 215 дена во болница, чекајќи да дојде нејзиниот ред за трансплантација. Радосниот момент беше снимен и стопли многу срца низ светот. Само што ја слушна убавата вест, веднаш му соопшти на татко си со кого разговараше преку видео повик.
Видео:
Ава се бори со сериозни срцеви проблеми уште од самото раѓање. Таа се родила со дупка во срцето, кое ѝ било сместено на спротивната страна од градниот кош, а коморите ѝ пумпале обратно.
Борбата на Ава започнала веднаш по раѓањето. Првата операција на срце ја имала само неколку дена подоцна. До петтата година храброто девојче преживеало неколку отворања на срцето, но минатото лето состојбата драстично ѝ се влошила. Единствениот излез бил трансплантација на срце.
Д-р Мадлен Таунсенд од медицинскиот тим што се грижеше за Ава изјави дека ѝ ја шепна веста на увце, бидејќи сакала таа самата да им ја соопшти на родителите.
„Нејзината насмевка тој ден, е еден од најубавите моменти во мојата работа“ – рекла докторката.
