Дали верувате во судбина?
Кристин Ламерт несомнено верува. 35-годишната мајка ја роди четвртата ќерка спонтано и непланирано на истиот ден од годината како и другите три ќерки.
9-годишната Софија, 6-годишната Џилијана и 3-годишната Миа се родени на 25 август само во различни години. Сега, во славењето заеднички роденден им се придружи и нивната новородена сестричка Валентина.
Во неверојатна игра на судбината, која се проценува дека се случува само еднаш на милијарда, малата Валентина дојде на овој свет екстра рано, на роденденот на сестричките. Таа требало да се роди на 25 септември.
„Не ни се верува, сè уште не можеме да поверуваме.“
„Роденденот на моето куче додека растев беше на 25 август. Потоа, 10 години подоцна, се роди Софија и ние мислевме дека тоа е кул. Кога дојде Џилијана, се роди малку порано. Потоа дојде Миа, таа подрани малку повеќе, а сега Валентина се роди екстра, екстра рано. Ниту ние не можеме да го разбереме концептот“ – објаснила мајката.
Ниту едно од породувањата на Кристин не било планирано, „ниту едно не е со царски рез, ниту едно не требало да се случи на начинот на кој се случи“.
„Ова воопшто не е често. Дури и ако се обидуваш да го погодиш тајмингот, логистички би било многу многу тешко. Лудо е што ги роди сите деца природно, непланирано, на истиот ден, во различни години“ – рекла докторката Меган Греј, која работи во болницата каде што се породи Кристин.
Валентина дошла на овој свет многу порано од очекуваното поради компликациите кои ги имала Кристин во бременоста. Таа страдала од прееклампсија, состојба која се карактеризира со висок крвен притисок.
„Ми рекоа да лежам и да внимавам за предупредувачки знаци. Тие се појавија на 23 август. Погледот ми беше навистина заматен и ми рекоа да одам во болница. По кратко време се претворив во итен случај. На полноќ на 25 август, знаевме дека ќе се роди на тој ден, но не бевме подготвени“ – објаснила таа.
Валентина се родила предвреме, но била многу здраво и силно бебе.
Секое од децата на парот е родено точно на три години растојание.
Гинисовиот рекорд за најмногу родени деца на ист ден во едно семејство е пет и го држи семејство од Вирџинија.