Дуа Липа со неколку фотографии им ја сподели на фановите веста дека заплива во брачните води. Музичката ѕвезда на Instagram објави фотографии од отмената церемонија на која стапи во брак со Калум Тарнер.
За регистрацијата, Липа избра елегантен бел комплет од Скијапарели и го искомбинира со дамски шешир и салонки од Кристијан Лобутин. Невообичаениот невестински стајлинг многумина ги потсети на изгледот на Бјанка Џегер на нејзината свадба со Мик Џегер.
Липа и Тарнер склучија граѓански брак во Лондон, а викендов ќе направат голема свадбена прослава на Сицилија.
Додека фановите чекаат да ѕирнат во луксузната забава која се подготвува во Италија, Липа ги изненади со веста дека ја поканила Кети Пери да пее на Sunny Hill Festival во Приштина и дека таа прифатила.
Во видео-разговор меѓу двете пејачки, Пери вели: „Многу сум возбудена што ќе одам во Косово“.
Sunny Hill Festival е еден од најзначајните и највпечатливите музички настани во Југоисточна Европа. Основан од Дуа и нејзиниот татко Дукаѓин Липа, фестивалот претставува вистински магнет за десетици илјади љубители на музиката. Годинава ќе се одржи на 31 јули и 1 и 2 август.
