Добрината со добрина се враќа: Повеќе од милион долари собрани за повредениот маж кој го разоружа еден од напаѓачите во Сиднеј

Ахмед ал Ахмед покажа исклучителна пожртвуваност и бестрашност во клучен момент, спасувајќи многу животи за време на крвавиот напад на плажата Бонди во Сиднеј. 

Сега светот му возврати со добрина и собра повеќе од 1 милион долари за лекување и закрепнување од прострепните рани нанесени додека ги штител другите.

Во моменти на целосен хаос и страв, кога повеќето луѓе се обидувале да се засолнат, Ахмед без двоумење се соочил со опасноста и помогнал да се разоружа еден од напаѓачите. Со тој храбар чин, според проценките, спречил уште поголема трагедија. За време на интервенцијата, Ахмед бил застрелан двапати.

Неговата храброст не остана незабележана. Само неколку дена по настанот, преку онлајн кампања за собирање средства, луѓе од целиот свет се обединија за да му помогнат. Речиси 1 милион долари се собрани како поддршка за неговото лекување, закрепнување и справување со психолошките последици од траумата.

Откако бевме сведоци на извонредните постапки на херојот кој помогна да се разоружа еден од напаѓачите за време на трагедијата во Бонди, чин со кој беше спречена загубата на безброј животи, почувствувавме обврска да преземеме акција.

Во момент на хаос и опасност, тој истапи без двоумење. Неговите постапки беа несебични, инстинктивни и неспорно херојски, преземени без никаква грижа за сопствената безбедност. Според првичните информации, тој бил застрелан двапати додека ги штител другите.

Овој GoFundMe е создаден за да ја изразиме нашата благодарност и поддршка за човек кој покажа неверојатна храброст кога тоа беше најпотребно.

Започнуваме со почетна донација од 50.000 долари, во чест на овој вистински херој и за да му помогнеме во закрепнувањето и справувањето со долгорочните последици од ова трауматично искуство.

Никој не очекува да биде херој, но кога дојде моментот, тој беше токму тоа.

Секој придонес, без разлика на големината, е моќен начин да се каже „благодарам“ – стои во апелот.

Нападот на плажата Бонди се случи на еврејскиот празник Ханука, кога двајца напаѓачи, татко и син, започнале да пукаат во насобраните луѓе и убија 15 лица, меѓу кои и 10-годишно девојче. Во болница се 42 лица со повреди.