DIY: Сензорни шишиња, тегли и кеси со материјали од домот за стимулација на сетилата на децата
Често го добивам прашањето за идеи и препораки за игри со најмалите.
Денес ќе говорам за сензорни игри кои можеме да ги направиме и сами, со материјали од домот.
Девојките обожаваат да истражуваат и експериментираат. Креирањето на Сензорните Шишиња е шанса да бидат креативни, фокусирани и трпеливи. Прилично често се дел од нашите активности, па имаат направено голем број, во сите варијанти, со сè што ни се наоѓа во домот.
Сензорните шишиња се одлична игра и стимулација за сетилата на најмалите.
Преку допирот на истите се стимулира тактилното сетило, преку многу светки и бои се стимулира сетилото за вид, а со тропкањето на малите делчиња и сетилото за слух. Одлични се за насочување и задржување на вниманието кај децата, а имаат и смирувачко дејство.
Што ви е потребно?
Покрај пластичното шише (jас лично сум против стаклени, поради безбедносни причини, бидејќи овие сензорни активности се и за бебиња), употребуваме најразлични ситни делчиња за пополнување.
- Камчиња, копчиња, тестенини, ориз/грав и други работи кои едноставно би тропкале и би го задржале вниманието на децата.
- Спајалици, доколку користиме магнет од надворешна страна за истите да се движат.
- Ситен декор како цевки пресечени на мали парчиња, водени перли и сл. и потоа дополнуваме со вода.
- Вода обоена со (прехранбена) боја и различни светки.
- Комбинација од масло и вода (може и во боја). Како што споменав, неограничена креативност и одлична игра и за најмалите.
Подготовка
Процесот на подготовка е следен:
Сензорно шише. Шише со 2/3 вода го дополнуваме со безбоен лепак и добро го затвораме и промешуваме. Потоа додаваме светки и декор по желба.
Сензорна тегла. Во три мали сада ставаме малку растворена боја (јас искористив 3 видови на бои). За најмалите може да се употреби пластичен сад со соодветна форма.
Во теглата ставаме топчиња памук, полеваме со еден вид боја и потоа малку светки. Потоа втор ред памук, повторно полеваме со боја, на крај другиот вид и повторно светки. Истата постапка ја повторив и трет пат, потопувајќи го памукот со третиот вид боја.
Сензорна кеса. Малку вода, малку бебешко масло, некоја капка сина боја и светки/претходно споменатиот декор. Логоата од кесата ги отстранив со ацетон и со селотејп добро ја затворив истата. За најмалите, кои сè уште лазат, залепете ја оваа кеса со селотејп на подот.