Пред да започнам да говорам за себе, за нас, за нашето искуство, би кажала неколку зборови околу стимулацијата и интервенцијата, за полесно диференцирање и сфаќање на суштината и значењето на истите.
Рана стимулација
Најновите истражувања докажаа дека играта во првите години од животот на детето е од огромно значење за неговиот понатамошен развој и играат огромна улога врз неговите идни социјални, емоционални, моторни, но и когнитивни вештини.
Целта на раната стимулација не е да го форсираме детето да постигне цели и да изврши задачи за кои сè уште не е спремно. Напротив, потребно е да се препознае потенцијалот на секое дете и соодветно да се стимулира истиот, истовремено да се препознаат предизвиците со кои се соочува и со соодветни активности да се зајакнат неговите вештини.
Секое дете е различно и има сопствено темпо на развој. Да не го заборавиме тоа и сопствените желби и цели кои можеби ги имаме како родители во врска со развојот на сопственото дете да ги прилагодиме на него и неговите способности, афинитети и желби.
Достигнувањата во развојот зависат од повеќе фактори и пред донесување на целокупен заклучок, потребно е добро да ги запознаеме сите и да ја сфатиме нивната поврзаност пред да избрзаме со погрешни заклучоци.
Да не се форсира детето. Иако на моменти делува дека границата помеѓу стимулирање и форсирање е тенка, да бидеме внимателни и да не ја преминуваме.
Игра со детето. Единствен начин за стимулација на бебето, од најраната фаза во животот, е токму преку играта. Од огромна важност е да се чувствува удобно, да е нахрането, одморено и наспано, а ние да му овозможиме средина за тоа. И подоцна потребно е да се обезбеди стимулативна средина која ќе му овозможи на детето без одвлекување на внимание во вид на различни медиуми или сл. да игра и да се забавува.
Рана интервенција
Целта на раната интервенција е поддршка на деца со пречки и дефицити во развојот, но и деца кои се со ризик за настанување на истите.
Цели и сфери на рана интервенција
- Стимулирање на перцепцијата, движењата, комуникацијата и говорот на детето.
- Совладување на техники за недостатокот на вештини од една сфера да се надополнат со вештини од друга, со цел евентуалните дефицити да се надокнадат.
- Поддршка во развојот на вештини од секојдневниот живот.
- Поддршка на социјалниот и емоционалниот развој.
- Когнитивните способности на детето да се подобрат.
- Логичкото размислување и способноста за решавање проблеми и донесување одлуки.
- Внимание, фокус, анализирање.
Децата кои имаат проблем со слухот, деца кои имаат проблем со говорот, деца кои имаат проблем со видот, деца со пречки во когнитивниот развој, деца со физички потешкотии и деца кои покажуваат знаци на психички проблеми се препорачува да добијат ваков вид на интервенција, соодветно, според потребите.
Раната интервенција опфаќа дијагностика, третмани и евалуација, но и советување и поддршка за родителите.
Моментот кога родителот ќе увиди или ќе му биде соопштено од страна на стручно лице дека кај детето постојат дефицити и потешкотии во развојот може да биде вистински шок.
Прифаќање на состојбата на детето, но и секоја помош која стои на располагање од страна на стручните лица, се од огромна важност за надминување на оваа состојба или нејзино ублажување.
Важни области за рана стимулација и рана интервенција
- Фина моторика - развојот на фината моторика ги вклучува рацете и прстите на детето, што е од огромно значење од моментот кога бебето ќе го открие движењето на рачињата.
- Груба моторика ги опфаќа другите делови од телото, рацете, нозете и општото држење на целото тело.
- Социо-емоционалниот развој е од огромно значење за можноста детето да ги познава сопствените емоции, да ги препознава туѓите, но и да успее да воспостави врска и поврзаност со останатите.
- Говорот и можноста да зборува и одговара.
Раната стимулација и раната интервенција ги опфаќа децата од моментот на самото раѓање, па до 6 години или претшколска возраст.
Детскиот развој е сложена област и колку и да сметаме дека ги познаваме нашите деца, сепак постојат работи кои не можеме секогаш да ги согледаме објективно, па поради тоа потребно е да ги слушаме советите и насоките на терапевтите. Го издвојувам профилот на plachkaigrachka_razvojni_igri затоа што можете да најдете убави постови поврзани со детскиот развој и проблемите со кои може да се соочуваат децата, објаснети на суштински и разбирлив начин за секого.
Мој омилен пост е компарацијата на детскиот развој со тортата, кој на сликовит начин го опишува детскиот развој и овозможува секој родител да го визуелизира и да запомни дека една торта (детски развој) ќе изгледа убава на лик доколку направиме совршена и избалансирана внатрешност на тортата.