Детали за киднапирањето на Даниел Кајмакоски во Белград: Му се заканувале со пиштол и нож, го пронашле врзан, се огласи и мајка му
Даниел Кајмакоски викендов беше киднапиран во Белград по настапот во познат локал, а благодарение на сплет на околностите и брзата реакција на полицијата, тој е пронајден жив и без повреди.
Македонскиот пејач, кој во 2014 година победи на „X Factor Adria“, бил пресретнат од киднаперите кои биле вооружени со пиштол и нож. Тие го принудиле да влезе во автомобил, го врзале и од него барале 20.000 евра во замена за неговиот живот, заканувајќи се дека нивни соучесници ќе им наштетат на неговата сопруга и децата.
Густата магла и лизгавиот коловоз одиграле клучна улога во неговото спасување. Осомничените, во услови на намалена видливост, се дезориентирале и удриле во заштитна ограда. Автомобилот бил оштетен, по што двајцата киднапери, за кои се смета дека се странски државјани, побегнале во непознат правец, оставајќи го Кајмакоски врзан во возилото.
Даниел беше пронајден од полицијата и сега е дома. Полицијата и понатаму трага по осомничените и ги испитува сите околности на случајот.
Информации за киднапирањето сподели и Миланка Рашиќ.
По настанот кој привлече големо внимание во регионот, за Блиц се огласи и мајката на Кајмакоски, Ружа, која е во шок.
„Ви благодарам на прашањето. Се слушнавме. Важно е дека е жив, а рано е да е каже дали е добро. Во вакви ситуации, човек најмногу стравува за своите деца. Јас сум во шок“ – рекла потресената жена.
Даниел долги години живее и работи во Србија. Во брак е со Марина со која има и две дечиња.
