Во македонскиот град на светлината и филмската магија, каде црвениот килим на „Браќа Манаки“ блеска со гламур и традиција, Миланка Рашиќ се издигна како вистинска дама на стилот и културата. Со ненаметлива харизма и отмена грација, таа ја преточи својата љубов кон уметноста и модата во визуелен расцвет на елеганција, носејќи креации од познатиот битолски бутик „Ермитаж“.
На свеченото отворање, познатата водителка блескаше во темносин светкав фустан, а следните денови и во женствени, лелеави силуети кои ја нагласија нејзината романтична страна. Секоја нејзина појава пленеше со софистицираност, потврдувајќи дека модата е нејзиниот таен код за невербална комуникација со публиката.
За модниот избор на Фестивалот и соработката со Весна и Офелија, сопственичките на „Ермитаж“, Миланка вели:
На свеченото отворање на фестивалот „Браќа Манаки“ му прилега гламур и затоа избравме светкав темносин фустан кој убаво изгледа и на камера, бидејќи бев водителка на црвениот килим.
Одлична ни е соработката со Весна Станковска и Офелија Станковска од бутик „Ермитаж“ уште од 2022 г. Тие ја следат модата и трендовите, знаат што ми стои и го почитувам нивниот избор.
Носев комплет со пантолони, како и женствени, лелеави, романтични фустани. Елегантниот изглед е уште еден начин да се изрази почит кон фестивалот и неговата големина.
Секојдневно бев на сцена претставувајќи ги филмовите во официјална конкуренција и присутните гости, директори на фотографија. Особена чест ми беше да го претставам светски прочуениот Дариус Конџи на посебна свеченост, кога му беше доделена наградата за животно дело Златна камера 300.
Со него снимивме и интервју за МРТВ, како и со Оскаровецот Воли Фистер, добитник на Златна камера 300 за особен придонес во светската филмска уметност.
Носам модели од „Ермитаж“ и во емисијата за филм „Во кадар“ на МТВ. Со сестрите Весна и Офелија убаво соработуваме, вистински дами се. Навистина ја ценам и нивната поддршка на културните настани во Битола кои секогаш ги промовираат, од концерти до изложби и фестивали.
„Браќа Манаки“ се одржуваше од 20 до 26 септември во Битола под мотото „Сон на платно“.