Црна Гора воведе „менструално отсуство“: Жените имаат право на два слободни дена поради болни циклуси

Црна Гора воведе измени во Законот за задолжително здравствено осигурување со кои на жените им се овозможува право на до два дена платено отсуство месечно со надомест од 100 отсто од платата, поради болни менструални циклуси.

Иницијативата за ова законско решение уште во март, во пресрет на Денот на жената, ја поднесе независната пратеничка во црногорското Собрание, Јевросима Пејовиќ, а предлогот доби едногласна поддршка од собраниските одбори пред конечно да биде изгласан.

Сепак, се појаснува дека ова право не важи автоматски за секоја жена која има вообичаени менструални болки. Тоа е наменето за осигуреници кај кои лекар специјалист има дијагностицирано секундарна дисменореја, односно болна менструација предизвикана од претходно утврдени органски и гинеколошки состојби. Во образложението на законот како причини се наведуваат заболувања како ендометриоза, миоми, полипи, воспаленија на јајниците и полицистични јајници.

За да може да го користи ова право, вработената жена ќе треба да приложи лекарско уверение кое ќе се издава од специјалист и ќе мора да се обновува секоја година и редовно да му се доставува на работодавецот.