Цело семејство Бекам ја поддржа Викторија во Париз, Бруклин и Никола ја прескокнаа нејзината ревија
Викторија Бекам ја претстави својата нова колекција на Модната недела во Париз и доби огромна поддршка од семејството, особено од сопругот Дејвид кој ѝ порача дека се гордее со неа.
Речиси сите членови на семејството го следеа модното шоу на 52-годишната дизајнерка од првиот ред во француската метропола. Дејвид, Харпер, како и Ромео и Круз со девојките гордо позираа покрај Викторија, а на семејната фотографија недостасуваше само најстариот син на парот, Бруклин.
„Многу се гордееме со тебе. Повторно ја покажуваш твојата елеганција, страста и убавината преку начинот на кој сакаш луѓето да се чувствуваат во твојата облека. Се чувствуваме толку среќни што сме дел од твојата прекрасна вечер, на место кое толку многу го сакаме. Браво, не можевме да бидеме погорди“ – напиша тој на Instagram.
Иако Бруклин и неговата сопруга Никола Пелц во исто време престојуваа во Париз и присуствуваа на други настани од Модната недела, не се појавија на ревијата на Викторија, што дополнително го разгоре семејниот скандал.
За време на една од нивните прошетки, Бруклин носеше блуза со натпис: „It’s Not Clocking To You“ (Не ти е јасно).
Фразата стана позната кога Џастин Бибер ја употреби за време на тензична расправија со фотограф минатата година, а значи дека некој не забележува или не разбира нешто што би требало да му биде очигледно.
Поради актуелната семејна ситуација во семејството Бекам, изборот на таа блуза веднаш привлече внимание и поттикна шпекулации дека пораката има посебно значење. Сепак, Бруклин не кажал дека натписот е поврзан со неговото семејство.
Според наводи објавени во британските медиуми, односите меѓу Бруклин и неговите родители и понатаму се исклучително затегнати, а блиски до семејството велат дека засега нема знаци дека двете страни ќе се помират.
Последен пат Бруклин и Никола беа на ревијата на Викторија во септември 2024 година, неколку месеци пред семејниот конфликт да стане јавен. Оттогаш, односите дополнително се влошија, а Бруклин во јануари јавно ги обвини своите родители за контролирање и за обид да ја нарушат неговата врска со Никола.
