Бугарија ја оствари својата прва победа на изборот за песна на Евровизија. Поп-ѕвездата Дарина Јотова, позната како ДАРА (DARA), го освои 70-тото јубилејно издание на најголемиот телевизиски музички настан во светот со нејзиниот заразен хит „Bangaranga“.
Младата музичарка ги освои симпатиите и на стручните жирија и на публиката, што претставува првпат овие две групи да изберат ист победник по речиси 10 години (од Киев 2017). Така, таа освои вкупно 516 поени (204 од жирито и 312 од публиката).
„Ова е неверојатно. Воопшто не знам што се случува во моментов“ – изјави видно возбудената ДАРА на прес-конференцијата по победата.
Победничкиот настап на Бугарија
Евровизија ја опиша ДАРА како „една од најпознатите поп-музичарки во нејзината земја, која го обликува имиџот на современата бугарска поп-музика со својот уникатен глас, моќно сценско присуство и нескротливо мешање на жанрови.“
Победата на Бугарија е импресивна, бидејќи доаѓа по тригодишно отсуство од натпреварот (од 2023 до 2025 година).
Грандиозното финале се одржа во арената Wiener Stadthalle во австриската метропола пред околу 10.000 гледачи. Домаќини на вечерта беа Викторија Сваровски и Михаел Островски.
Како што често се случува, овогодинешниот гламур не помина без геополитички влијанија. Натпреварот во Виена беше одбележан со најголемиот политички бојкот во историјата на Евровизија. Пет земји (Шпанија, Холандија, Ирска, Исланд и Словенија) го бојкотираа учеството поради присуството на Израел, во знак на протест против војната во Газа.
Израел, чие учество предизвика контроверзии, го освои второто место. Израелскиот претставник Ноам Бетан ја изведе рок-баладата „Michelle“ на три јазици, а публиката беше поделена со реакциите.
Настапот на Израел
Од земјите од регионот, најдобро пласирана е Грција, која заврши на 10 место.
