Брилијантни: Детскиот хор „Св. Кирил и Методиј“ од Велес освои злато на меѓународен натпревар во Грција

Детскиот хор „Св. Кирил и Методиј“ од Велес се закити со златен медал и го освои првото место на меѓународниот хорски фестивал „Музика и море“, кој се одржа во Паралија.

Под раководство на диригентката Веселинка Маџарова, младите велешани се претставија со четири композиции, со кои успеаја да ги освојат симпатиите и највисоките оценки на стручното жири во Грција.

Посебни пофалби од жирито доби и професорката за изборот на репертоарот, кој очигледно одигра важна улога во брилијантниот настап на хорот. Особено впечатлива беше песната за „малечката мува“ која навистина сите ги остави без зборови, но исто толку убаво  беше изведена и „Дафино вино црвено“.

„🎼Најдобар хор во категорија на детски хорови и влез за натпревар во гран при🎶 ЗАЕДНО можеме и повеќе❤️ Благодариме на Општина Велес што во континуитет го поддржува Детскиот хор Св. Кирил И Методиј“ - напиша Веселинка Маџарова на социјалните мрежи и сподели фотографии и видеа од настапот.

„Музика и море“ е многу популарен фестивал кој традиционално се одржува секоја година во средината на септември во крајбрежното туристичко место Паралија. Фестивалот има натпреварувачки и ревијален дел, а на него учествуваат стотици хорови (детски, младински, машки, женски и мешани) од цела Европа.

ФОТО: Facebook / Веселинка Маџарова