Брат му го освои трофејот, а тој срцата: 3-годишниот брат на Ламин Јамал е најслатката ѕвезда на СП
Додека Ламин Јамал ја предводеше Шпанија до светската титула, уште еден член од неговото семејство застана во центарот на вниманието.
Неговиот помал полубрат стана вистинска интернет сензација по прославата на теренот веднаш по победата над Аргентина во финалето на Светското првенство.
По последниот судиски свиреж, 3-годишниот Кејн облечен во дрес со број 19 истрча кон својот постар брат со раширени раце и скокна во неговата прегратка. Насмеаниот Јамал го крена високо и долго го прегрнуваше, а фотографиите од нивната средба за неколку часа го обиколија светот и ги разнежнија љубителите на фудбалот.
Ова не е првпат Кејн да стане вирален хит за време на Мундијалот. Во текот на целиот турнир, камерите често го забележуваа како навива од трибините, слави голови и го бодри својот брат, па многумина го нарекоа „најслаткиот навивач на Светското првенство“.
Lamine Yamal's younger brother, Keyne, waving to him after Spain advanced to the World Cup final ❤️ pic.twitter.com/QJKznXorjw
— SportsCenter (@SportsCenter) July 14, 2026
Кејн е син на мајката на Јамал, Шејла Ебана, од нејзината подоцнежна врска и е роден во септември 2022 година. Освен него, фудбалерот има и полусестра по име Бараа.
Јамал никогаш не криел колку му значи неговото мало братче. По една од победите на Шпанија на турнирот, емотивно изјави дека најсреќен е кога ги гледа мајка си и брат му насмеани.
„Мојот мал брат ми е сѐ. Го сакам како да е мој син и комплетно сум заљубен во него“ – рече тогаш 19-годишниот фудбалер.
