Докторите секојдневно спасуваат животи, но не очекуваат ништо за возврат.
Кога д-р Мајкл Шенон го спасил животот на предвремено родено бебе во 1985 година, не можел ни да претпостави дека судбината ќе си поигра со него и дека истото тоа „бебе“ ќе го избави од сигурна смрт 26 години подоцна.
Крис Троки (лево) и д-р Мајкл Шенон (десно)
Пред точно 4 години, Шенон, кој работи како педијатар, доживеал тешка сообраќајна несреќа при која неговиот автомобил останал заглавен под камион. Пожарникарите веднаш одговориле на повикот за помош, но возилото на Шенон веќе било зафатено од огнените јазици.
Пожарникарскиот тим успеал да го изгасне огнот и да го извлече заробениот доктор, но поради сериозноста на изгорениците, тој веднаш бил пренесен во болница. Два од неговите прсти на нозете биле ампутирани.
Болничарот Крис Троки бил еден од првите луѓе кои стигнале на местото на несреќата. Кога Троки го посетил спасениот доктор на болница, сфатил дека тоа е истиот човек кој пред 26 години се изборил за неговиот живот. „Не знаев за тоа додека не отидов во болница и не започнав да разговарам со д-р Шенон“ – изјавил подоцна Троки.
Крис бил роден предвремено и тежел само 1,5 кг, кога докторите констатирале дека шансите да преживее се 50:50. Но, д-р Шенон во ниту еден момент не се откажал од него и останал на работа сè додека не се уверил дека здравствената состојба на новороденчето е стабилна.
Сега, д-р Шенон е горд што го гледа Крис пораснат и е среќен што се вратил во неговиот живот кога му бил најпотребен. „Чувството да ги гледам бебињата пораснати е неверојатно, но вистинско чудо е што едно од нив се врати во мојот живот дента кога навистина имав потреба од тоа“ – рекол Мајкл.
