Бил Гејтс призна дека ја изневери бившата сопруга Мелинда со две Русинки, се извини за поврзаноста со Епстин

Бил Гејтс призна дека ја изневерувал својата поранешна сопруга Мелинда и им се извини на вработените во фондацијата за поврзаноста со покојниот педофил Епстин.

На интерен состанок со вработените во својата фондација, основачот на Microsoft потврдил дека имал две вонбрачни врски со руски државјанки додека бил во брак, но негираше каква било поврзаност со жртвите на Епстин, кој почина во затворска ќелија во 2019 година, додека го чекаше судењето за трговија со малолетнички за сексуална експлоатација.

„Имав афери. Една со руска бриџ-играчка која ја запознав на бриџ-настани и една со руска нуклеарна физичарка со која се сретнав преку деловни активности“ – изјавил тој.

„Не направив ништо незаконско. Не видов ништо незаконско. Да разјаснам, никогаш не сум поминал време со жртвите“ – изјавил Гејтс на средбата со вработените.

Милијардерот призна дека било „огромна грешка“ што одржувал контакти со Епстин.

„Им се извинувам на другите луѓе кои беа вовлечени во ова поради грешката која ја направив“ – рекол тој.

Бил и Епстин се запознале во 2011 година, три години откако педофилот се изјасни за виновен за подведување малолетничка на проституција. Контактите траеле до 2014 година. 

Гејтс истакнал дека неговата поранешна сопруга изразила загриженост за контактите со Епстин уште во 2013.

Случајот фрли сенка врз работата на фондацијата, особено затоа што станува збор за организација чија работа во голема мера зависи од јавната доверба и репутација.

Во неиспратените мејлови на Епстин било наведено и дека Гејтс наводно добил сексуално пренослива болест од Русинки, па се обидел да најде антибиотици за да ѝ ги подметне на неговата тогашна сопруга Мелинда, со цел да ја прикрие инфекцијата.

Бил и Мелинда се разведоа во мај 2021 година по 27 години брак.