„Без моето убиено дете немам роденден, јас сум жив мртовец“: Потресна објава на мајката на Ивона која загина во „Пулс“
Поминаа 14 месеци од трагедијата во Кочани, кога избувна пожар во дискотеката „Пулс“ и го одзеде животот на 63 млади лица.
Мајката на Ивона Антова, чиј живот згасна на само 21 година, постојано споделува трогателни објави кои допираат до срцето на секој кој ќе ги прочита.
Стојка, на која Ивона ѝ беше единствено дете, расплака многумина со текстот кој го објави на својот роденден, на кој истовремено се навршуваа 14 месеци од смртта на нејзиното чедо. На денот кој некогаш бил симбол на радост и семејна среќа, сега останаа само спомени, болка и непребол.
Еве го нејзиниот текст и фотографиите од Ивона:
14 месеци без тебе мило мое🖤😭
16…
Датумот што некогаш беше најсреќниот ден за мене, за моите родители, за нашето мало, скромно, а пресреќно семејство…Денот кога со радост го чекав утрото и прегратката од моето единствено дете.
„Мамичке, среќен роденден“ — зборови што ми ја полнеа душата.
Прегратка толку силна, толку полна со љубов, што мислев дека мојата мала, мила ќеркичка ќе ме скрши од гушкање.Заедно го пиевме утринското кафе, заедно се смеевме, ме изненадуваше со поклонче, со торта, со внимание какво што само едно дете полно со љубов знае да даде.
И цел ден се радувавме… што сум станала година постара, што уште една година сме ја проживеале заедно.
Но… проклетиот 16 ми го уби животот.
Денот што беше симбол на среќа, стана најмрачната дата за една мајка.
Денот кога ми го убија единственото чедо.Не од болест… не од судбина што тивко предупредувала…
Туку поради пари, мито, корупција, нечовечност.
На тој проклет 16 престана мојот живот.
Душата ми замре.Срцето само механички чука, од ден за ден, само за да можам да отидам и да запалам свеќичка на мојата убавица.
Јас повеќе немам роденден.
Еве втора година… втор роденден без тебе, чедо мое.Денот кога сум родена, а јас без мојата душа не постојам.
Без моето срце немам ништо.
Без моето убиено дете јас сум жив мртовец.
🖤😭Ivona Antova 🪽🖤😭♾️😭😭😭😭😭
