Беше фан на ДНК, пееше со нив... Сопругата на Андреј од ДНК со порака која крши срца за девојчето кое почина со мајка си по пад од зграда

Вчера, Македонија ја потресе ужасната вест за смртта на 31-годишна мајка и 8-годишна ќерка по пад од зграда во Тафталиџе.

Никој не остана рамнодушен на фактот дека мајката со години трпела семејно насилство од сопругот, кој многупати го пријавувала, но никој не ја заштитил.

Денес, се прошири видео на кое починатото девојче пее на сцената заедно со групата ДНК во декември 2024 година.

Ни го „украде” вчерашното шоу – напишаа тогаш членовите на бендот на својот Facebook профил.

Се огласи и Наталија Ѓорѓиеска, сопругата на покојниот Андреј од ДНК, која сподели порака напишана од мајката на девојчето, Ивана, која ѝ била колешка и ја познавала лично.

Во неа, Ивана ѝ изразува сочувство за смртта на Андреј и ѝ кажува дека тој ѝ бил идол на ќерка ѝ, која ги знаела сите негови песни.

Денес згаснаа уште два животи поради институционална неодговорност. Да не се повтори! Најискрено сочувство до семејството на Ивана, ми беше колешка и ја познавав лично. Нека почиваат во мир – напиша Наталија.