Барбара Палвин на црвениот тепих во Кан откри дека е бремена 8 месеци по операцијата од ендометриоза
Осум месеци откако јавно проговори за борбата со ендометриозата и операцијата низ која помина, Барбара Палвин откри дека го очекува првото дете со сопругот Дилан Спраус.
Среќната вест парот ја сподели на црвениот тепих на 79-тото издание на Канскиот филмски фестивал. 32-годишната манекенка блесна во светлосин фустан со пердувести детали од Miu Miu и нежно си го галеше трудничкото стомаче додека позираше со 33-годишниот актер.
Пред осум месеци Барбара сподели дека се оперирала поради ендометриоза, болест со која тивко се борела со години. Во описот на фотографиите од болнички кревет таа искрено зборуваше за силните болки, заморот, нередовните циклуси и непроспиените ноќи кои долго време ги сметала за „нормални“.
„Мислев дека едноставно така функционира моето тело“ – напиша Барбара и откри дека дури по консултација со специјалист дознала дека има ендометриоза.
Сега, наместо болнички фотографии, Барбара и Дилан споделуваат насмевки од Кан и радосни вести за новото животно поглавје кое ги очекува.
Ѕвездата од серијата „The Suite Life of Zack and Cody“ и унгарската манекенка се запознаа на забава во 2017 година, а врската ја започнаа во 2018. Во јули 2023 година направија романтична свадба во Унгарија.
