„The Artist“ е најголемиот победник на Оскарите 2012

Синоќешното доделување на престижните награди Оскар помина во знакот на црно-белиот француски филм „The Artist“. Вкупно пет статуетки завршија во рацете на тимот кој стоеше зад ова филмско дело.

„The Artist“ победи осум други номинирани филма за да ја добие најпосакуваната награда за Најдобар филм, а режисерот на овој филм, Мишел Хазанавишиус, ја освои наградата за Најдобра режија.

Жан Дижарден со задоволство ја прими наградата за Најдобар актер за неговата улога во„The Artist“. Натали Портман му ја додели златната статуетка на актерот кој успеа да ги победи Гери Олдман, Бред Пит и Џорџ Клуни, кои беа номинирани во истата категорија.

Жан Дижарден

Мерил Стрип се закити со третата статуетка во својата богата и успешна кариера. 62-годишната актерка, која има рекордни 17 номинации за Оскар, беше прогласена за Најдобра актерка за нејзината улога во филмот „The Iron Lady“.

Мерил Стрип и Жан Дижарден

„The Artist“ имаше силна конкуренција според бројот на освоени награди. Мартин Скорсезе со неговото дело „Hugo“ исто така доби пет Оскари и тоа сите во технички категории.

Кристофер Плaмер на 82 години го доби својот прв Оскар и тоа во категоријата Најдобар актер во споредна улога, станувајќи највозрасната личност која некогаш добила Оскар. „Ти си само две години постара од мене, драга. Каде беше цел мој живот?“ – ѝ се обратил Пламер на добиената статуетка, која за првпат била доделувана за филмови направени во 1927 и 1928 година.

Кристофер Плaмер

Наградата за Најдобра актерка во споредна улога заврши во рацете на Октавија Спенсер за улогата во филмот „The Help“.

Октавија Спенсер

„Rango“ беше прогласен за Најдобар анимиран филм, „A Separation“ за Најдобар странски филм, „Midnight in Paris“ ја доби наградата за Најдобро оригинално сценарио, а „The Descendants“ го освои Оскарот за Најдобро адаптирано сценарио.