Под мотото „Апсолутна власт, апсолутна забава“, кое ветуваше многу, а исполни уште повеќе, преполната арена „Борис Трајковски“ синоќа беше епицентар на македонската култура и естрада. 29-тото издание на најпрепознатливата манифестација кај нас уште еднаш докажа зошто оваа вечер одамна е институција, спојувајќи ја врвната продукција со искрена емоција и многу хумор.
Под режисерската палка на Ранко Петровиќ, на сцената продефилираа над 120 учесници. Програмата вешто балансираше меѓу модерното и безвременското, нудејќи ретро-носталгија која ја исправуваше публиката на нозе.
Свеченоста ја отвори виртуозот Владимир Четкар, крунисан за Најпопуларен џез артист, по што сцената ја освои младата Тина Русева, прогласена за Најперспективна пејачка, со моќна интерпретација на антологиската „Не допирај ме“.
Вечерта беше обоена и со признанија за оние кои оставија неизбришива трага во уметноста, па така наградата за животно дело му припадна на академик Васко Ташковски, додека актерката и режисерка Снежана Конеска-Руси беше одликувана како симбол на професионализмот и уметничката посветеност.
Театар Комедија триумфираше со „Пар распар“ како Најдобра претстава, додека младите сили Нина Елзесер и Тони Денковски беа прогласени за Најдобри млади актери. Спортскиот пиедестал беше резервиран за кошаркарската легенда Владо Илиевски.
Емоциите се множеа кога легендарниот Круме Спасовски, како добитник на наградата за животно дело, ја почести публиката со својот вечен хит „Чудна жена беше Вера“. Слична топлина донесе и признанието за трајни музички вредности доделено на Дамир Имери, како и на вокалот на „Црвена јабука“, Дражен Жериќ – Жера, кој со изведбата на „Са твојих усана“ ја пренесе публиката во едно друго време.
Македонскиот супермодел Катарина Ивановска ѝ го врачи признанието за Најпопуларна регионална пејачка на Александра Радовиќ.
Во светот на модерните ритми, Тони Зен беше потврден како Најпопуларен хип-хоп артист, а младиот Јаков Јозиновиќ се истакна како регионално откритие.
Кулминацијата на вечерта се случи со прогласувањето на Хитот на годината, песната „Води ме“, проследена со моќен настап на Калиопи и Слаткаристика. Калиопи ја потврди својата позиција како Пејачка на годината, додека кај мажите таа титула му припадна на безвременскиот Владо Јаневски.
Традиционалниот мелос беше претставен преку Влатко Миладиновски, чиј фолк концерт беше прогласен за најдобар.
Дека нашата „Бубамара“ ги надминува границите потврдија и меѓународните гости – британската група Delegation и американската соул-ѕвезда Марта Хај, кои заминаа со награди за животно дело.
За смеата и острата сатира се погрижија Атанас и Тино, кои со многу дух ги коментираа актуелните општествени збиднувања.
Сепак, најсилниот емотивен печат го остави Игор Џамбазов. Со видлива грутка во грлото, тој им оддаде почит на великаните кои не напуштија изминатата година, потсетувајќи нè на трагите што тие ги оставија во нашата колективна меморија.
Низ спојот на музиката, смеата и достоинственото сеќавање на минатото, 29-тото издание на „Златна бубамара“ успеа да ја обедини публиката во емоција која траеше долго по гаснењето на рефлекторите. Со секоја измината година, манифестацијата расте, но нејзината суштина останува иста, т.е. да биде светилник на квалитетната забава и трајните вредности кои ја движат македонската културна сцена напред.
Фото: Благоја Цоканов / Femina.mk