Ана Ивановиќ и официјално се збогува со професионалното играње тенис. Организаторите на Ролан Гарос со церемонија го одбележаа крајот на кариерата на српската тенисерка која победи на турнирот во 2008 година.
На свеченоста, Ана се појави во едноставен бел фустан и црни балетанки со врвки и ѝ се обрати на публиката.
„Кога се подготвував за врачувањето, си ветив себеси дека нема да плачам. Но, беше тешко да се задржат солзите. Ми се вратија многу емоции, беше преубаво. Се сеќавам кога бев овде, кога го подигнав трофејот и полетав во прегратката на родителите“ – рече таа.
Иако многумина сметаат дека таа прерано се пензионира, 29-годишната спортистка изјави: „Мислам дека беше во вистинско време. Многу нешта влијаеа на таквата одлука. Поминаа веќе шест месеци и не се каам заради тоа.“
На церемонијата присуствуваше нејзиното семејство.
Бастијан Швајнштајгер преку социјалните мрежи ја поздрави својата сопруга со топла порака. „Тажен сум што не можам да бидам со тебе во Париз за твоето официјално пензионирање денес. Она што го имаш постигнато во твојата кариера е неверојатно! Премногу се гордеам со тебе и едвај чекам да те прегрнам“ – напиша тој и сподели фотографија на која Ана го држи трофејот.
