24-годишна наставничка победи на Мис на светот, Македонија ја претставуваше Ева Величковска
Доминиканската убавица Јохеири Мола беше прогласена за Мис на светот 2026 на спектакуларното финале кое се одржа во Нја Чанг, Виетнам.
24-годишната наставничка, новинарка и хуманитарна активистка ја освои престижната титула во конкуренција на 111 претставнички од целиот свет. Круната ѝ ја предаде минатогодишната победничка, Опал Сучата Чангсри од Тајланд.
За прва придружничка беше избрана Елизабет Рејнес од Шпанија, а титулата втора придружничка ја освои Танусија Чети од Малезија.
Новата Мис на светот работи како наставничка по литература и општествени науки на англиски јазик. Таа е основачка и претседателка на иницијативата „Voices of Tomorrow“, преку која им овозможува на деца и млади од ранливи заедници да учат англиски јазик.
Во финалниот круг, Мола зборуваше за важноста на образованието и за тоа како познавањето јазици може да им отвори нови можности на младите. Нејзината посветеност на хуманитарната работа беше еден од клучните моменти во нејзиниот настап.
Македонска претставничка беше Ева Величковска, која не се пласира во Топ 40, но имаше можност да ја претстави нашата земја на светската сцена и да биде дел од јубилејното 75-то издание на натпреварот.
Финалето се одржа на голема сцена покрај илјадници гледачи. Виетнам за првпат беше домаќин на престижниот натпревар за убавина.
