Серена Вилијамс го изненади спортскиот свет со одлуката да се пензионира од тенисот. 40-годишната тениска легенда со малата ќерка позираше за „Вог“, а во интервјуто ја образложи одлуката да се повлече од професионалниот тенис и ја истакна желбата со нејзиниот сопруг Алексис Оханијан да имаат второ дете.
„Во изминатава година, со Алексис се обидуваме да имаме второ дете. Добивме информација од мојот доктор која ме опушти и поради која се чувствувам сигурнo дека кога ќе сме подготвени, ќе можеме да го прошириме нашето семејство“ – изјави Серена.
За разлика од првата бременост со ќерката Олимпија, таа е решена овој пат нештата да бидат поинакви. „Дефинитивно не би сакала да бидам повторно бремена како атлет“ – споделува таа и потенцира дека била два месеца бремена кога го освои Australian Open во 2017, а и периодот по породувањето не ѝ бил воопшто лесен.
„Од царски рез и пулмонарен емболизам се вратив на гренд слем финале. Играв додека доев. Играв додека поминував низ постпородилна депресија“ – посочува таа за модната библија.
Една од најуспешните тенисерки на светот, со освоени 23 гренд слем титули објави дека се повлекува од тенисот, а нејзиниот настап на US Open ќе биде последниот обид да освои уште еден турнир.
„Не го сакам зборот ‘пензионирање’. Најдобриот начин за да се опише ова е еволуција подалеку од тенисот и еволуција поблиску до нештата кои ми се важни... Верувајте ми, никогаш не сакав да морам да избирам помеѓу тенисот и семејството. Мислам дека не е фер. Ако бев маж, немаше да го пишувам ова. Ќе бев на теренот, играјќи и победувајќи додека мојата жена ќе се трудеше да го прошири семејството“ – образложува успешната спортистка.
Одлуките не се лесни, но Серена е подготвена за новите предизвици.
„Нема радост во оваа одлука. Мразам што морам да бидам на оваа раскрсница. Посакував да беше лесно за мене, но не е. Растргната сум: Не би сакала да ставам крај, но во исто време подготвена сум за она што е следно“ – заклучува Вилијамс.
