Згодниот доктор од „Grey’s Anatomy“ за првите симптоми пред дијагнозата со АЛС: „Десната рака не ми функционира“

Ерик Дејн за првпат застана пред камерата за интервју по ужасната дијагноза со АЛС (амиотрофична латерална склероза).

52-годишниот актер, познат по улогата на згодниот доктор Марк Слоун во „Grey’s Anatomy“, ги сподели првите симптоми кои ги почувствувал пред да се упати на лекарски прегледи, рече дека десната рака не му функционира повеќе и призна дека семејството му е најважно од сè.

„Никогаш нема да ги заборавам тие три букви. Со мене е од моментот кога ќе се разбудам. Не е сон“ – рекол тој.

Ерик одлучил да зборува за „сите кои ќе ја добијат лошата вест како него да знаат дека не се сами“.

„Ми се појави слабост во мојата десна рака. Вистината е дека тогаш не мислев ништо во врска со тоа. Помислував дека премногу пишувам или дека раката ми е изморена. Но, по неколку недели забележав дека ми се влошува и отидов кај специјалист за раце...“ – објаснил Дејн за првите симптоми.

Конечно, по 9 месеци се соочил со ужасната реалност дека има неизлечива болест која постепено ги убива нервните клетки кои се поврзани со мускулите и која ги засега рацете, нозете, говорот, дишењето и може да предизвика парализа.

„Сега имам една функционална рака. Мојата доминантна страна е десната. Левата ми функционира, десната комплетно престана да работи. Уште некој месец нема да ја имам ниту левата рака. Загрижен сум за моите нозе“ – рекол тој.

Веста за здравствената состојба на актерот се рашири еден месец откако неговата сопруга Ребека се откажа од разводот и само еден ден откако таа го нарече „најдобар пријател“ за време на настан. Ерик и Ребека имаат две ќерки,15-годишната Били и 13-годишната Џорџија.

„Не мислам дека ова е крајот на мојата приказна. Во моето срце не чувствувам дека ова е крајот од мене.“

„На крајот од денот само сакам да поминам време со моето семејство. Секој ден им кажувам колку ги сакам. Тие се сакани и го знаат тоа“ – рекол тој.