„Во животот ќе ни бидеш водилка ти, Андреј од Карпош 3“: Поема за Андреј од ДНК на денот на неговиот погреб
Денес е најтажниот ден за нашата земја.
Во Кочани, Штип, Пробиштип, Скопје и Облешево ќе бидат погребани 59 лица, чии животи згаснаа во трагичниот пожар што ја потресе целата нација.
Нема зборови кои можат да ја опишат длабоката празнина која останува по нивното заминување, ниту болката која ја чувствуваат нивните најблиски. Тоа што се случи на овој кобен ден ќе биде впишано во историјата, но и во срцата на сите нас, како трајна болка која никогаш нема да исчезне.
Александар Тарабунов на Instagram сподели поема напишана за Андреј Ѓорѓиески од ДНК, кој го изгуби животот додека спасуваше други. Неговото тело ќе биде погребано денес во Бутел.
Андреј од Карпош 3
Секогаш ќе бидеш истиот, каде и да си,
добар, смешен и фин, Андреј од Карпош 3.
Со тебе растеа генерации,
со твоите песни од животни ситуации.
Имаше глас што сите нè буди,
во маало сите те паметиме по старите дружби луди.
Таков си беше ти, со сите беше брат,
сега, во овие денови црни, ко некој да нè дави за врат.
Ќе ни фалиш засекогаш,
и во животот ќе ни бидеш водилка ти,
ќе нè потсетуваш да помагаме на луѓе беспомошни,
како што тоа го правеше ти,
Андреј од Карпош 3!
Вечна ти слава
Сочувство до целото семејство.
