Меланија Трамп го доби високото украинско државно одликување „Орден на принцезата Олга“ од прв степен од украинскиот претседател Володимир Зеленски.
На посебната средба во Белата куќа со претставници на Украина и Русија, Првата дама на САД се појави во елегантен бел костум од модната куќа Долче и Габана, кој веќе го има носено во неколку наврати. Својот стајлинг, таа го надополни со салонки од Маноло Бланик.
Но, на средбата во Вашингтон, модата беше во втор план, а на прв беше нејзиниот придонес во хуманитарната мисија поврзана со Олешки, град во кој со нејзино посредување, беше договорено локално примирје за да се овозможи евакуација на цивили.
Одликувањето во Белата куќа ѝ го врачија украинските претставници Давид Арахамија и Дмитро Лубинец, кои ѝ се заблагодарија за храброста и ангажманот во спасувањето на украински граѓани и враќањето на украинските деца дома.
„Го избравме човештвото наместо војната“ – порача Меланија, изразувајќи надеж дека примерот од Олешки ќе поттикне нови напори за мир и хуманитарна соработка.
На Instagram, убавата Словенка сподели фотографија и напиша:
„Длабоко сум почестена што го примив Орденот на принцезата Олга од прв степен од претседателот Зеленски.
Нашите напори за постигнување примирје во Олешки, со кое помогнавме да бидат спасени речиси 800 луѓе, како и повторното обединување на 34 деца со нивните семејства, покажуваат дека заедничката мисија може да направи значајна разлика во животите на луѓето.“