Во пресрет на јубилејот – 30 години на Детскиот музички фестивал „СИ-ДО“, организацискиот тим интензивно работи на подготовките за новото издание кое ќе се одржи на почетокот на месец мај.
Три децении „СИ-ДО“ значи детска песна, радост, талент и генерации млади изведувачи кои ги направија своите први музички чекори токму на оваа сцена.
Подготовките се во тек, ќе има нови изненадувања и содржини кои ќе го одбележат овој значаен момент. Публиката ќе има можност да ужива во 20 сосема нови детски хитови, создадени со современ музички израз, свежа енергија и препознатливиот дух на фестивалот – изјави организаторот на фестивалот Дарко Шерденков.
Во чест на 30-годишнината, предвидена е и проширена програма која ќе ги обедини сите генерации учесници, од првите фестивалски почетоци до денешните млади ѕвезди. Ќе се спојат спомените и иднината, искуството и новата енергија, во едно заедничко славење на детската музика.
Децата, најважниот дел од оваа приказна, со нетрпение го очекуваат новото издание. За нив, „СИ-ДО“ не е само фестивал, туку сон, сцена и искуство кое се памети цел живот. Еуфоријата расте и со нетрпение го очекуваме ова јубилејно издание кое носи и многу изненадувања.
Фестивалот „СИ-ДО“ оваа година не само што ќе ја продолжи својата традиција, туку ќе испише и ново, блескаво поглавје во својата историја. Почетокот на мај ќе биде во знакот на песната, насмевките и незаборавната детска радост во Битола.
