Вчерашниот спектакуларен концерт во предградието Совето во Јоханесбург на симболичен начин го означи започнувањето на Светското првенство во фудбал.
Над 30 000 луѓе го проследија концертот во живо и дури ни ниските температури не ги спречија да се радуваат и да уживаат во феноменалниот концерт.
Познати фудбалери, локални музичари и интернационално признати ѕвезди беа дел од тричасовниот концерт на големата сцена на стадионот „Орландо“.
Black Eyed Peas успеаја да ја загреат публиката со нивните познати хитови меѓу кои и „I Gotta Feeling“, „Pump It“ и „Boom Boom Pow“.
Освен многуте африкански изведувачи, на сцената се појави и Алиша Кис, на којашто бременоста не ѝ попречи да биде дел од свечената манифестација.
Енергичната латино ѕвезда Шакира покажа дека динамичното танцување не влијае на нејзиниот специфичен глас и ја покачи еуфоријата на разиграната публика со „Hips Don't Lie“ и официјалната песна на Светското првенство „Waka Waka“.
Забавата започнува!