„Тешко на вашите дома... Засрамете се“: Илина Арсова им врати со револт на троловите со одвратни коментари за неа

Илина Арсова не остана рамнодушна на навредливите и деградирачки коментари за неа на социјалните мрежи.

Македонската планинарка не го криеше разочарувањето од навредите по нејзиното гостување во подкастот „Смисла“, особено поради тоа што некои од нив доаѓаа од „очигледно фамилијарни луѓе“.

Во својата објава, Илина сподели дел од коментарите и им порача на хејтерите: „Засрамете се“.

Ми се појави објавата на Sloboden Pecat каде споделуваат делови од разговорот со сестра Ефимија и Отец Бобан, за подкастот Смисла.

Не дека сметам дека тоа е некоја вест што треба да се објавува покрај многу поактуелни проблеми со кои се соочуваме, сепак целиот разговор беше навистина преубав и инспиративен за многумина кои слично се почувствувале во даден момент. И ви благодарам на сите што ми пишавте.

Е сега објаснете ми го ова, профили како овој, очигледно фамилијарни луѓе што коментираат со ваков јазик. Тешко на вашите дома. 

Понатаму коментарите за убавина се исто така интересни и споредбата со даден фалус, имајќи предвид дека истиот го величат. Искрено убедена сум дека самите немаат огледало дома, а како и да е за да одиш на подкаст не треба да си фото модел.

Некои луѓе имаат време да се замараат и да коментираат под содржина која не им се допаѓа, а зошто едноставно не сменат канал до она што им прилега. Затоа што тие луѓе и самите себе се мразат, како што вели Игор Џамбазов на кого истовремено му се пикате, па го хејтате дури и овде. Овие коментари не ме навредуваат особено гледајќи од каде потекнуваат, но се навреда за навистина убаво смислена емисија со духовни луѓе.

Така да, засрамете се, а ние ќе се помолиме и за вас 💜