„Свеќите ќе згаснат, но тагата НЕ“: Битолчани со мирен марш и молк за жртвите во пожарот во Кочани

19 март 2025, 10:31

Градот под Пелистер тагува за трагедијата во Кочани. Битолчани со мирен собир и марш испратија порака за почит кон починатите и сочувство кон нивните семејства, а воедно не го сокрија и револтот кон надлежните за многуте пропусти кои доведоа до кошмарната несреќа.

„Свеќите ќе згаснат, но тагата НЕ“, „Или се селиме или живи гориме“, „Колку животи треба да ЗГАСНАТ за да видите дека тишината ВРЕСКА?!“, „Малите рачиња што сонуваа утре да ги допрат ѕвездите, сега лежат во тишината. Колку срца треба да престанат да чукаат? Разбудете се!“, „Нека ви гори совеста како што гореа невини животи“, „Заради ова тато сака да си одиме“, „Не би имало толку крв да беше сè по закон“, „Смртта е крај, но спомените се вечни“, „До кога ќе ни бидат очите широко затворени?“, „Македонија крвари, крвариме и ние“, „Уште колку надежи ќе згаснат?“, „Сите сме во иста дискотека веќе 35 години“, „Пепелот зборува за нивната приказна“ – се само дел од пораките кои ги испратија граѓаните преку транспарентите.

Толпата тргна од плоштадот Магнолија кон Офицерскиот Дом каде следуваше 7-минутен молк и пуштање на црни балони во чест на десетиците згаснати млади животи.