Екстравагантната ревија на Victoria’s Secret денес за првпат се одржа во романтичниот Париз и претставуваше возбудлива фузија на маестрално изработени крилја, сензуална долна облека, гламурозни модели и енергични музички настапи.
Шест сегмента го сочинуваа спектакуларното шоу во срцето на Градот на светлината. Колорит и елементи од различни култури обединуваше „The Road Ahead“, сексапилот на фаталната жена го инспирираше „Secret Angel“, игрива наивност и женственост владееше во „Mountain Romance“, ултра секси готик костими беа прикажани во „Dark Angel“, модерниот уличен стил проткаен со спортски нишки го диктираше „Pink Nation“, додека ведрина и гламур се спојуваа во „Bright Night Angel“.
Погледите на гостите ги хипнотизираа вкупно 82 костими на извајаните тела на 51 модел. Впечатливите обувки го носат потписот на американскиот дизајнер Брајан Етвуд.
Ангелите Адријана Лима, Алесандра Амбросио, Лили Олдриџ, Елза Хоск, Џасмин Тукс, Жозефин Скривер, Марта Хант, Стела Максвел, Тејлор Хил, Сара Сампајо, Роми Страјд и Лаис Рибеиро беа придружени од десетици свои колешки, меѓу кои Бела и Џиџи Хадид, Кендал Џенер, Ирина Шајк, Даниела Брага, Изабел Голарт, Лили Доналдсон, Џоан Смолс, Лиу Вен, Грејс Елизабет и Меган Вилијамс.
Градникот од фантазиите годинава го носеше Џасмин Тукс. Над 9.000 скапоцени камења како смарагди и дијаманти го красеа градникот со кој 25-годишниот модел мамеше погледи кон пистата. Се проценува дека таа креација на Еди Борго вреди 3 милиони долари.
Жозефин Скривер буквално блескаше во аутфит декориран со 450.000 сваровски кристали со ракави тешки 9 килограми. На нејзините чизми сјаеја дополнителни 1.630 кристали.
Лејди Гага, Бруно Марс и The Weeknd беа задолжени за музиката на чиј ритам чекореа ангелите.
Доследна на својот ексцентричен стил, Лејди Гага носеше чизми со супер високи штикли и во еден момент дефилираше со нив по пистата.
