„Сиромаштијата има женско лице“ е слоганот под кој денес, на Меѓународниот ден на жената, се одржа марш за женски права во Скопје.
„Маршираме бидејќи држава во која жените не се вклучени како еднакви, е држава во која нема напредок. Општество во кое жените се невработени и преработени, незаштитени, виктимизирани, објективизирани и лишени од своите права, е сиромашно општество“ – потенцираат учесниците.
Маршот, организиран од активистки и Платформата за родова еднаквост, започна пред Владата, а крајната дестинација беше паркот „Жена Борец“. Нивна цел е да повикаат на промени и да ги потсетат клучните институции дека:
- Отсуството на политики, стратешки документи и механизми кои го поддржуваат унапредувањето на родовата еднаквост и правата на жените значи дека институциите дозволуваат системска дискриминација и насилство.
- Женската сиромаштија демне во сите аспекти од општествениот живот, а е особено изразена поради пандемијата со КОВИД-19, што доведе до голем број на отпуштања во прекарните индустрии, како што е текстилната, каде најголем дел од вработените се жени, но КОВИД мерки и механизми за економско зајакнување на жените отсуствуваат!
- Жените и понатаму не се ниту близу подеднакво вклучени во креирањето на политики и мерки, како и носење одлуки, кои ќе ги земат предвид потребите на сите граѓан(к)и. Онаму каде нема квоти, како што се извршната и локалната власт, одлуките ги носат доминантно мажи – само 4 жени, наспроти 17 мажи во Владата на Р.С.М; 2 градоначалнички, наспроти 79 градоначалници во локалната власт.
Фото: Александар Буневски / Femina.mk