„Секој здив ми е болка. Едвај дишам, помогнете ми, имам за кого да живеам“: Апел за помош на Бране кој има рак
Отворете го срцето и помогнете му на Бране Марковски во неговата борба за живот.
37-годишниот Македонец има карцином на белите дробови и тумор на црниот дроб, а првиот и пресуден чекор за него е веднаш да замине во Турција за да му направат детални испитувања и да го подготват за терапијата која може да му го спаси животот.
За тоа му се потребни 21.000 евра, средства кои неговото семејство не може да ги обезбеди без помош од хуманите граѓани.
Прочитајте го неговиот апел објавен на страницата на Фондацијата „Павел Андреев“ и донирајте ТУКА: „Да го спасиме животот на Бране“
Го чувствувам телото како отслабнува. Дишам тешко. Секој чекор ми е борба. А сега морам да побарам – помогнете ми. Ми треба вашата помош за да преживеам.
Имам само 37 години. До пред неколку месеци живеев како и многу други – сонот ми беше иднина со мојата сакана Марија, дом, семејство, деца, заеднички утра. Бев активен, спортував, градев живот. А денес – секој здив ми е болка, секое будење страв.
Животот ми се смени за миг кога ми ја соопштија дијагнозата: Карцином на белите дробови и тумор на црниот дроб.
Состојбата брзо се влоши – едвај дишам, имам отежнато движење, во стомакот ми се собира вода, телото ми слабее секој ден. Татко ми ја изгуби истата битка. Сега, мајка ми, брат ми и Марија се тука покрај мене… но веќе не можеме сами. Мора да заминам во Турција веднаш – за да започнам подготвителен процес пред лекување.
На 10.06 треба да заминам за Турција – таму ќе ми направат детални испитувања и ќе ме подготват за терапијата што може да ми го спаси животот.
21.000€ се потребни само за овој прв, но пресуден чекор.
Колку ќе трае и ќе чини целото лекување – ни јас не знам… но знам дека без оваа фаза, понатаму нема.
Не сакам да се откажам. Сè уште имам надеж. Имам за кого да живеам.
Затоа ви се обраќам со отворено срце. Ве молам, донирајте. Споделете. Помогнете.
Секој придонес е чекор кон лекување. Секое споделување е светлина во мојата темнина.
Секој од вас може да биде дел од мојата шанса за живот.
Времето тече. А јас се борам. Но не можам сам.