„Се будиме во 'хотел' под милион ѕвезди“: Маја Кикириткова открива зошто 4 години летуваат во шатор со децата
Наместо во хотел со ѕвезди, Маја Кикириткова Трајковски и нејзиниот сопруг Александар со децата веќе четири години по ред избираат да летуваат во камп. Парот, заедно со малите Лазар и Ева, летово повторно престојува три недели во кампот „Полари“, во близина на хрватскиот град Ровињ, место кое ги освоило со беспрекорната организација, природата и чувството на слобода.
Под нивната тенда, функционира цел дом. Готват исто како дома – од леќа до морски ракчиња, имаат комплетно опремена кујна, фрижидер и сè што им е потребно за удобен престој. При изборот на парцелата, секогаш внимаваат таа да биде што поблиску до плажата и тоалетите, за полесна организација со децата.
Љубовта кон кампувањето, раскажува Маја, се родила сосема случајно, на нивното прво кампување во Љубаништа. Токму таму го почувствувале она чувство на слобода кое, како што вели, не може да се доживее на ниту еден друг вид одмор.
Спиењето во кровен шатор, кој се наоѓа над нивниот автомобил, воопшто не им претставува проблем, за нив ваквото искуство „да се будиш во хотел под милион ѕвезди“, не се купува со ниедни пари на светот.
Во разговор за Фемина, Маја открива зошто кампувањето за неа е многу повеќе од обичен одмор, како изгледаат подготовките за три недели живот во шатор и што би им порачала на семејствата кои сè уште се двоумат дали да се впуштат во ова искуство.
Кампувањето сè почесто станува избор на семејствата кои сакаат поинаков одмор. Според вас, кои се неговите најголеми предности, а дали воопшто постојат слабости кога патувате со деца?
Нема брзање, денот трае долго, на камп го има најубавото зајдисонце
Кампувањето за мене е стил на живот. Или го сакаш или не. Но, едно знам, еднаш кога ќе пробаш, не можеш да останеш рамнодушен. Нема маани, само предности. Нема брзање, денот трае долго, нема притисоци за брзање на појадок, ручек, вечера. Цел ден со солена кожа и коса, навечер се тушираш и пред 22ч. си заспан, а пред 7ч. станат. На камп го има најубавото зајдисонце и седење до 21ч. на плажа.
Децата се безгрижни, функционираат сами. Никогаш не сум била камперско дете, ниту пак мојот сопруг. Пред 4 години, сосем случајно отидовме кај пријатели во Љубаништа и знаев дека тоа е совршениот одмор, без кавги и натегања.
Зад едно успешно кампување, стојат и добри подготовки. Колку време ви е потребно за да тргнете на пат и што никогаш не смее да остане дома?
Со оглед дека трета година патуваме со сопствена камперска опрема, на нас сѐ ни е подготвено и спакувано во кутии преку цела година. Неколку дена пред кампување го ставаме шаторот врз кола, а два дена претходно ги премивам сите садови за во кујна, пеглам сѐ што ми е потребно и пакуваме во кола. Буквално тоа што го користиме за камп, не го користиме дома, така и нема опција нешто да заборавиме, затоа што сѐ е тука од лани.
Најнеопходни се продолжните кабли и приклучокот за струја, зависи каде се оди и каква струја се користи. Овде спаѓа и добар фрижидер.
Многу родители сакаат да пробаат кампување, но стравуваат дали ќе се снајдат. Што би им порачале на оние кои сè уште се двоумат?
Кампот е слобода за децата, но и за родителите
Еднаш кога ќе пробаат, никогаш нема да сакаат да се вратат на летување во хотел. Кампот е слобода за децата, но и за родителите. Мора да знаат дека може да фати и дожд и невреме и да бидат спремни на секакви предизвици, но кога се оди во камп, а не на див камп, нема опасност од ништо. Луѓето на камп се премногу љубезни и сите пријателски настроени, па што и да ви фали или да ви треба помош, секогаш ќе се најде некој тука.
Зад вас се четири години кампување, дали веќе имате омилени дестинации? Кои кампови од регионот досега ви оставиле најсилен впечаток?
Хрватска е позната по убави кампови, направени како ресорти
Со оглед дека кампуваме 4 години, немаме посетено кој знае колку многу кампови. Последните две години кампуваме во кампот Полари во Ровињ, Хрватска и можам да кажам дека за мене е најубавиот камп кој го имам посетено. Дефинитивно Хрватска е позната по убави кампови, направени како ресорти, со аквапаркови и многу занимации за деца.
Реално во Грција такви кампови немам видено. Во Грција морето и плажите се незаменливи, но во Хрватска целокупната организација во камповите, чистота, околни места кои можат да се посетат не би ги менувала за ништо на свет.
Даница Караташова Илиоска / Femina.mk