Што ако маж ограбен пред банкомат во полициска станица би го прашале „А вака ли беше облечен?“.
Краткиот филм „Сам си го барал“ на Види Вака останува еден од најмоќните и најактуелни коментари за нашиот општествен менталитет и моментално е во центарот на нов вирален бран, иако изминаа неколку години од неговата премиера.
Видеото преку сатира прикажува апсурдна ситуација. Имено, маж кој е жртва на разбојништво е соочен со истите прашања и обвинувања кои најчесто им се упатуваат на жените жртви на сексуално насилство. Преку ова превртување на улогите, филмот јасно укажува на двојното виктимизирање на жртвата и барањето оправдувања за злонамерноста на насилникот.
Пораката зад видеото е недвосмислена: Јасно е. Со обвинувањето на жртвата се ставаме на страната на насилникот и придонесуваме насилството да остане неосудено од општеството, непријавено од жртвата и непроцесуирано пред законот.
Улогите во филмот ги имаат Сашко Коцев, Слаѓана Вујошевиќ и Драгана Костадиновска.