Меланија Трамп организираше дводневен самит во Вашингтон на кој присуствуваше сопругата на македонскиот премиер Рози Мицкоска.
На настанот „Fostering the Future Together Global Coalition Samit“, кој се одржа во Вашингтон, учествуваа претставници од 45 држави и над 20 водечки технолошки компании.
Целта на самитот е да ја зајакне глобалната соработка за подобрување на образованието, технологијата и благосостојбата на децата во услови на дигитална ера. Оваа иницијатива промовира создавање на партнерства меѓу државите и приватниот сектор, развој на иновативни образовни програми и користење напредни технологии, како што е вештачката интелигенција, за поддршка на младите.
Во рамките на самитот, Мицкоска имаше свое обраќање на работната сесија на тема: „Safety and Protection online“ (Безбедност и заштита онлајн).
Во својот говор, Мицкоска посочи дека во Македонија веруваме дека дигиталната писменост мора да започне порано во образовниот процес:
„Нашата цел е младите, не само да ја користат технологијата, туку да ја разбираат, да размислуваат критички за неа и да ја користат за решавање на проблеми од реалниот живот. Клучен чекор во оваа насока е училишната програма на 21 век, имплементирана во партнерство со меѓународните организации и приватниот сектор. Денес, 341 основни училишта и околу 1900 наставници во нашата држава се дел од оваа иницијатива“.
По работната сесија, учесниците на самитот, меѓу кои и Мицкоска, присуствуваа и на Tech Expo каде што најпознатите светски компании за напредна технологија ги презентираа дел од своите производи.
Самитот претставува официјално лансирање на глобална коалиција, која има за цел да им помогне на децата ширум светот да стекнат вештини потребни за иднината.
