Пукотници кон луксузниот дом на Ријана во Лос Анџелес: Пејачката била дома кога жена испукала повеќе куршуми

Драматичен инцидент се случи вчера кога жена испукала повеќе куршуми кон домот на Ријана во луксузната населба Беверли Крест во Лос Анџелес.

Според полицијата, нападот бил пријавен околу 13:15 часот по локално време, кога осомничената од автомобил почнала да пука кон куќата на пејачката. Станува збор за 30-годишна жена која подоцна била уапсена без отпор, а полицијата го пронашла и оружјето.

Како што пренесуваат американските медиуми, жената користела пушка и испукала околу десетина куршуми од возило „Тесла“ паркирано наспроти куќата. Најмалку еден од куршумите го пробил ѕидот на куќата.

Во моментот на инцидентот, Ријана била во домот во кој живее со својот партнер Ејсап Роки и нивните три деца Риза, Рајот и Роки, но нема информации дали некој од нив бил дома заедно со пејачката.

За среќа, никој не бил повреден во нападот.

Полицијата во Лос Анџелес соопшти дека случајот го истражува елитната единица за грабежи и убиства, додека мотивот за нападот засега не е познат.