„Привилегија и чудо“: Натали Портман на 44 години е бремена со третото дете, две години по разводот

Натали Портман сподели дека е во блажена состојба. Популарната актерка на 44 години го очекува третото дете, а прво со нејзиниот нов партнер, францускиот музичар и продуцент Танги Дестабл.

„Танги и јас сме многу возбудени. Едноставно сум премногу благодарна. Знам дека ова е огромна привилегија и вистинско чудо“ – изјави Портман за Harper’s Bazaar.

Позната по својата емпатија, Натали го искористи моментот да им испрати поддршка на сите жени кои водат битка со плодноста.

„Пораснав слушајќи колку е тешко да се забремени. Имам толку многу сакани луѓе кои поминале низ тежок период со тоа, па сакам да бидам полна со почит кон темата. Тоа е толку убава, радосна работа, но исто така не е секогаш лесна. Свесна сум колкава среќничка сум и чувствувам длабока благодарност“ – сподели таа.

Романсата на Натали со Дестабл започна во март 2025 година, една година по финализирањето на нејзиниот развод од режисерот и кореограф Бенџамин Мијипје.

Новото бебе ќе му се придружи на нивното големо, модерно семејство. Натали од бракот со Бенџамин ги има 14-годишниот син Алеф и 9-годишната ќерка Амалија. Дестабл е татко на две момчиња од претходната врска со француската актерка Луиз Бургоан.