„Постојано е тука, нè прегрнува“: Основачот на Exit емотивен на годишнината од смртта на сопругата со која има 3 деца

Душан Ковачевиќ тагува по загубата на својата сопруга, која почина по мачна борба со тешка болест.

На годишнината од смртта на саканата Ивана, основачот на EXIT напиша емотивен текст кој го објави на социјалните мрежи.

Неговите зборови допреа до многумина, бидејќи искрено зборува за тагата, љубовта и чувството дека таа и понатаму е присутна во нивните животи. Во трогателната порака, тој откри дека нивните три деца секојдневно ја чувствуваат близината на нивната мајка, а семејството и понатаму живее со спомените и љубовта кои таа им ја оставила.

Денес се навршува една година откако нашата Ивана премина на другата страна.

Кога луѓето ме прашуваат како сум, велам дека со три мали деца немам друга опција освен да бидам силен и да стојам цврсто на нозе. Кога ме прашуваат како се децата, одговарам дека се држиме едни со други. И навистина е така.

Меѓусебно сме си извор на љубов, сигурност, понекогаш нервоза, а потоа брзо и утеха, инспирација, радост...

А нивната мајка, таа е постојано тука. Кога легнуваме да спиеме, таа се вовлекува меѓу нас или нè прегрнува сите заедно. Не го зборувам ова метафорично. Токму со нашиот духовник разговарав за тоа дека не ми се јасни луѓето кои веруваат во Бог, а не можат да сфатат дека душата е неуништлива и дека, кога ќе го напушти телото, всушност е целосно слободна да биде каде и да посака.

Нашата мала ќеркичка тоа многу убаво го разбира. За неа е сосема нормално што мама е тука, во друга форма, но тука, присутна и разиграна. Си играме со неа, ја луламе на лулашка, ѝ праќаме бакнежи со заоѓањето на Сонцето и пред да заспиеме.

Велат дека децата, покрај сите баби, дедовци, тетки и други членови на семејството, енергијата и на мама и на тато ја чувствуваат преку родителот кој е покрај нив. Често ми претставува предизвик истовремено да ја покажам мајчинската нежност и дисциплината што се очекува од таткото. Затоа, кога на децата им е потребна утеха, ја повикувам Ивана да делува преку мене. И таа доаѓа.

Неодамна ни беа на гости пријатели со мало девојче на возраст на Атина. Ја чешлав нашата ќеркичка и, бидејќи сè уште не сум вешт со сложени фризури, ѝ реков на Атина: „Оди кај Милена да ти ја среди косата, таа е мама“. На тоа Атина ми одговори: „Тато е мама“, јасно ставајќи ми до знаење дека нема намера да мрдне од мојот скут.

Ивана е присутна не само кај нас, туку и кај нејзините бројни пријатели. Има многу чудесни „коинциденции“ кои се толку јасни пораки преку кои ни се обраќа, што не оставаат простор за сомнеж дали е тоа таа. Ги собираме сите на едно место, па еден ден ќе направиме изложба посветена на неа, каде што ќе ја раскажеме и таа приказна.

Им благодарам на сите добри луѓе за поддршката во текот на целото ова време. Вашата љубов, присуство и добрина ни даваат надеж дека за нашиот човечки род сепак има шанса.

Душан и Ивана стапија во брак на бајковитиот остров Ада Бојана, а заедно имаат два сина и една ќерка.