„Патувањата нè зближуваат“: Авантуристички пар си ја зацврстува врската додека го истражува светот

Запознајте ги Медлин Релф и Џордан Бовен, авантуристички пар кој е постојано во движење и има импресивна колекција од фотографии од различни места низ светот. 24-годишниот модел и нејзиниот 26-годишен партнер се заедно од тинејџерските години, но нивната љубов денес е многу посилна од порано. Според нив, тоа се должи на заедничките патувања.

Медлин и Џордан од Сиднеј, Австралија, се запознале пред десет години, а пред 4 години започнале да објавуваат фотографии на Instagram од своите патувања. Двајцата авантуристи сметаат дека е многу важно да имаш сродна душа покрај себе со која ќе го истражиш светот и дека токму тие заеднички патувања им ја зголемуваат љубовта.

„Чувствувам дека патувањата нè зближуваат. Се заљубуваме повеќе и повеќе еден во друг кога патуваме“ – рекла Релф. „Не би можела да го правам ова со никој друг. 13 месеци патување и сега сме дома посреќни отсекогаш“ – пишува таа на своја фотографија.

Но, парот не живее луксузен живот додека истражува егзотични дестинации и наместо да троши богатство на храна или пијалаци, се фокусира на запознавање на локалните жители. „Таму сме за да видиме нови нешта и да запознаеме нови луѓе. Сме спиеле на аеродроми, во автобуси и возови и сме јаделе храна на улица и сме ги делеле оброците. Гледаме да поминеме најевтино и да уживаме максимално во животот“ – додава Релф.