Откако со години континуирано го градеше својот звук и постепено придобиваше сè поголема публика, Христијан Настески-Пајак го објави својот прв студиски албум „2000 и некоја“.
Низата песни, кои веројатно брзо ќе станат хитови, веќе имаат и визуелни приказни и ги раздвижуваат неговите фанови, но и обожавателите на артистите со кои сними дуети: Тајзи, Тони Зен, Лара, Јован Јованов и Елвир Мекиќ.
„Овој албум за мене има тежина што не можам лесно да ја објаснам. Не е само музика, туку период од мојот живот во кој се случуваа многу работи, и убави и тешки. Сè што поминував, на некој начин завршуваше во студио. Затоа ова ми е прв проект каде што чувствувам дека сум целосно искрен. И затоа оваа промоција ја доживувам многу емотивно, како нешто што долго сум го носел во себе“ – вели Пајак.
Зад албумот стои Urban Records, предводен од Иван Јованов-Iwayo и Гордан Божиновски, чии улоги се клучни во обликувањето на целиот проект. Токму оваа соработка му дава на „2000 и некоја“ продукциска цврстина, но и простор Пајак да остане свој.
Во креативниот процес се вклучени и Лазар Цветковски, Луна, Таско, Тајзи и Елвир Мекиќ, како дел од поширокиот авторско-продукциски тим, чиј придонес се чувствува во звукот и дел од текстовите, без да се наруши неговиот препознатлив израз.
Тотално луда
Ризик
Тајни
Токсична
Допамин
Биди ми добра
Делириум
Паралелно со студиската работа, Lollipop Entertainment Group стои зад неговите настапи, градејќи ја врската со публиката и надвор од дигиталниот простор, таму каде што песните добиваат поинаква тежина.