Омилен рецепт со тестенини на македонската легенда Кирил Лазаров: Шпагети со морски плодови
„Машина за голови“, „дежурен непријател“ на странските ракометни репрезентации, „леворак бомбардер“... Кирил Лазаров има намножено многу епитети до своето име и сите се заслужени.
Најпопуларниот македонски ракометар е ризница на спортски совети, но ние се фокусиравме на неговите кулинарски преференции. Македонскиот спортист сподели дека исхраната е суштински важна за неговите перформанси.
“
Внимавам доста на исхраната. Особено по мојата 30. година. Се чувствувам многу подобро после квалитетен и здрав оброк. Исхраната е многу битна за професионалните спортисти, можеби и побитна од квалитетен тренинг.
Славниот спортист признава дека хедонистички ужива во добар оброк, но засега нема доволно време за да ги тестира своите вештини во кујната. „Гурман сум. Ретко готвам, а и искрено немам големо искуство со готвењето, ниту пак доволно време за да се посветам и уживам во тоа. За готвење се задолжени мојата сопруга и мајка ми“ - вели тој.
Капитенот на македонската репрезентација ни откри дека обожава тестенини со морски плодови, а ние ги подготвивме со Zlato Polje шпагети.
Шпагети со морски плодови
Состојки
| 250 гр | шпагети Zlato Polje |
| 1 мала конзерва (400 гр) | лупени домати |
| 450 гр | школки |
| 450 гр | чистени ракчиња |
| ½ шолја | бело вино |
| ½ главица | кромид |
| 1 чешне | лук |
| ½ мала лажичка | мелена црвена пиперка |
| 30 гр | путер |
| маслиново масло | |
| сол |
Подготовка
- Во тавче ставете 3-4 лажици маслиново масло и во него пропржете го иситнетиот кромид за да омекне. Ставете го и изгмечениот лук и пржете уште 2-3 минути, па додајте ја мелената црвена пиперка.
- Налејте го белото вино, а потоа и сосот од домати. Ако имате желба сосот да биде похомоген, можете да ги изблендирате доматите, но поедноставно е да ги разгмечете во самата тава. Гответе околу 5 минути, односно додека сосот не се згусти.
- Сварете ги шпагетите во солена вода според инструкциите на етикетата. Пред да ги исцедите, зачувајте ¼ шолја од течноста во која се вареа.
- Додајте ја таа течност во сосот со домати и ставете ги морските плодови. Поклопете го тавчето и гответе 4-5 минути. Имајте предвид дека школките се готват 1 минути подолго од исчистените ракчиња, па препорачливо е од нив да започнете со готвењето.
- Во подготвениот сос, додајте путер и тргнете го од оган. Измешајте го со приготвените шпагети и имате оброк за паметење.
Послужете ги тестенините додека се топли и декорирајте ги со иситнет магдонос и парчиња лимон.
