„Не штитете некој кој треба да е зад решетки“: Сопругата на Андреј од ДНК гневна за шпекулациите и односот од институциите
Наталија Ѓорѓиески за првпат се обрати по смртта на нејзиниот сопруг Андреја Ѓорѓиески – Андреј.
Испровоцирана од дезинформациите и од третманот на службите по огромната трагедија во Кочани, сопругата на пејачот кој го загуби животот спасувајќи други се обрати до јавноста преку пост на Facebook.
Таа замоли за сочувство, како и да престанат да се шират дезинформации дека бендот ја донел пиротехниката и побара сите кои се одговорни да завршат зад решетки.
Во овој момент, кој е најтежок за нас, медиумите и државните институции, ме предизвикувате за првпат да се обратам до македонската јавност.
Во текот на вчерашниот ден, по потрага на својот сопруг Андреја Ѓорѓиески, да го најдам во некоја од болниците, на домашна адреса не посетила криминалистичката служба која без објаснување го барала мојот сопруг, во присуство на нашето дете.
Истата служба ме побара телефонски во неколку наврати со НАЈНЕХУМАН однос да дадам информација каде е мојот сопруг со цел да даде изјава за настанот, за што истото прашање го упатив кон нив.
Од медиумите, кои пренесуваат ЛАЖНИ информации, дознале дека сопругот е на домашно лекување, додека тој лежи во болницата во Кочани, мртов.
Ги замолувам сите јавни медиуми да не шират дезинформации на социјалните мрежи.
Ги замолувам и јавните органи да си извршат детален увид за целиот трагичен настан.
Во овој тежок момент за сите нас, ЈАВНО ги замолувам институциите и медиумите да ја почитуваат пред се, нашата приватност.
Лажни објави дека мојот сопруг е на домашно лекување и дека пиротехниката е донесена од страна на бендот, ве молам, НЕ ШТИТЕТЕ НЕКОЈ КОЈ ТРЕБА ДА Е ПОЗАДИ РЕШЕТКИ!
Како сопруга и мајка на малолетно дете, покажете малку сочувство, а така и за поблиското семејство и пријателите...
