Битола синоќа без сомнение беше највеселиот град во државата. Детски џагор, позитивна трема зад кулисите, преполна сала... вака накратко би се опишала атмосферата на јубилејното 30. издание на „СИ-ДО“.
Детскиот фестивал кој започна пред три децении, синоќа докажа дека со годините станува само пошарен и поенергичен. Уловивме моменти кои се вистински празник за очите: мали ѕвезди кои со огромна самодоверба владееја со сцената, забавни костими, кореографии кои сигурно со недели биле вежбани по дома пред огледало и секако, најискрени детски емоции кои едноставно не можат да се одглумат.
Беше прекрасно да се види како генерациите кои некогаш самите растеа со „СИ-ДО“, сега од публиката навиваа за новите музички надежи.
На самиот почеток на манифестацијата, краток говор одржа директорот на Фестивалот, Дарко Шерденков, кој ѝ се заблагодари на публиката што ентизијастички со години ја поддржува детската песна.
Водителка на настанот беше актерката Маја Андоновска Илијевски.
Фемина е медиумски покровител на популарниот фестивал.
Фото: Ивона Кочов / Femina.mk