Меланија Трамп со јакна со натпис „Не ми е гајле“ за посета на деца-имигранти го разбесни светот

Намерно или ненамерно, Меланија Трамп направи моден кикс кој предизвика револт и море критики.

На нејзината посета на центар за деца-имигранти на границата на Тексас со Мексико, таа тргна со јакна со контроверзен натпис: „Мене навистина не ми е гајле, а вам?“. Зелената јакна доаѓа од популарниот бренд Zara.

Иако по слетувањето во Тексас, Меланија ја соблече јакната, нејзиниот моден избор беше остро осуден.

Посетата на Меланија доаѓа непосредно по одлуката на Доналд Трамп да се прекине разделувањето на децата-имигранти од нивните родители, пракса која неговата администрација ја спроведе за да го намали нелегалното преселување од Мексико во САД.

Директорката за комуникации на Првата дама на САД се огласи со порака дека медиумите треба да се фокусираат на работата на Меланија, а не на нејзината облека.

Today’s visit w the children in Texas impacted @flotus greatly. If media would spend their time & energy on her actions & efforts to help kids - rather than speculate & focus on her wardrobe - we could get so much accomplished on behalf of children. #SheCares #ItsJustAJacket

— Stephanie Grisham (@StephGrisham45) June 21, 2018

Доналд Трамп сподели дека сепак Меланија сакала да испрати порака со својата облека, но не за децата, туку за медиумите. „'Мене навистина не ми е гајле, а тебе?' испишано на грбот на јакната на Меланија се однесува на Медиумите за Лажни Вести. Меланија научи колку нечесни се тие и навистина повеќе не ѝ е гајле!“ - напиша тој.

“I REALLY DON’T CARE, DO U?” written on the back of Melania’s jacket, refers to the Fake News Media. Melania has learned how dishonest they are, and she truly no longer cares!

— Donald J. Trump (@realDonaldTrump) June 21, 2018

Меланија се соочи со сличен бран критики кога минатата година се упатуваше кон Тексас за да ги посети настраданите од ураганот Харви. Тогаш таа беше фотографирана пред Белата куќа во елегантни салонки и многумина побрзаа да искоментираат дека тоа не се соодветни обувки за посета на место погодено од природна катастрофа и дека се „навредлив“ моден избор. И покрај тоа што таа се пресоблече во авионот и слета во Тексас во лежерна комбинација со патики, коментарите не престанаа да се множат.