Многу славни личности синоќа присуствуваа на прославата по повод 70-годишнината од постоењето на Фондот за деца при Обединетите Нации (УНИЦЕФ).
Дејвид Бекам, Орландо Блум и Џеки Чен беа дел од мажите кои со стил зачекорија на синиот тепих во седиштето на ОН во Њујорк.
41-годишниот сопруг на Викторија Бекам во елегантен костум и со насмевка позираше пред фоторепортерите, каде подоцна му се придружи и актерката Пријанка Чопра.
Како дел од прославата, Бекам претходно го вклучи осветлувањето на „Емпајар Стејт Билдинг“ и се сретна со група деца. Тој е амбасадор на добрата волја на УНИЦЕФ од 2005 година, а неодамна беше дел од моќна кампања против насилството врз децата.
На настанот, Орландо Блум пристигна во елегантен црн костум. 39-годишниот холивудски актер е амбасадор на добрата волја на УНИЦЕФ од 2009 година, а во таа улога минатата година ја посети и Македонија.
Џеки Чен стана Амбасадор на добрата волја на УНИЦЕФ пред 12 години. На синиот тепих тој позираше со лице кое ги изгуби своите екстремитети како последица на нагазна мина.
„УНИЦЕФ беше создадена за да им помогне и да им донесе надеж на децата чии животи и иднини се ставени во ризик. Нашата мисија не е помалку важна ниту денес. Додека УНИЦЕФ им дава надеж на децата, децата се надежта на светот за подобра иднина, за сите нас“ – изјавија од УНИЦЕФ.